drinkyeah 飲控 的部落格

激動，係有原因架！
經過咗兩次失敗嘅戀情之後， 相信奇蹟呢個信念令 Syrah 繼續抬起頭，往前走！
正當我想將剩低嘅 Syrah 都 K.O. 埋嘅時候，咦，仲有一個機會！

我嗱嗱聲走去廚房， （其實點解係嗱嗱聲？求解！）
搵番盒義美蛋糕出嚟，我叮一聲！係你喇！ 
Syrah嘅初戀呀！



我急不及待咁將佢切成一小粒一小粒，
佢嘅芝士味慢慢咁滲出嚟喇！
講真，我真係好耐好耐，真係好Q耐無食過義美，
因為佢唔係太好食，唔太鬆化，相對於阿默，南蠻堂，或者其他，真係低一個檔次，
可能因為喺香港無得食，都係葡萄是酸的的道理，
不過，呢一刻嘅我都係想搵到 Syrah 嘅另一半，
我理得佢係唔係最好食。

好喇，又係由 Food & Matching 嘅時侯喇！
輕嚐兩口傳統芝士蛋糕，都未咬晒，
我已經拎起隻杯，準備佢地水乳交融嘅一刻，
結果‥‥‥雖然都唔係太帶到啲 Syrah 入面嘅果味出嚟，
但不至於好似之前辛辣麵同魷魚絲咁 High 晒嘢，
因為 Syrah 呢種提子係比較 Rich，所以佢可以配義美呢種重口味嘅食物，
始終佢酸味強亦都係一個致命傷，
點都好，恭喜你，你搵到你嘅 one night stand 喇。