drinkyeah 飲控 的部落格

要將一日嘅拆分成三集絕對唔係我想，
但當我諗到每一樣都同酒有關嘅時候，
我就不經不覺越寫越多，希望喱民了解到每一個細節其實都影響到酒嘅味道，
放心，我今篇會長話短說！



上回講到，說時遲那時快，
我地就飲完支 half bottle 嘅 Chablis，
晚餐前，緊係開埋支西班牙紅酒啦！

用 Cabernet Sauvignon 加一種不知名葡萄混合而成，
朋友V 話上次買咗支同酒莊嘅酒覺得幾好，仲要六十幾蚊有交易！
嗰陣六點幾。

初嘗一口，感覺到木桶味幾重，加上少少黑加侖子味，
Body 適中，如果襯啲果味比較重嘅應該幾有效果嘅。
嗱，到呢一刻都未出事架！



好喇，各國嘅佳麗準備出場喇！
我就整咗最穩陣嘅 Carbonara，
Siu Ming 伉儷就整咖哩雞同沙律，
朋友V 同佢老公O 就煮牧羊人批同炆蠔，
朋友K就焗熱啲麵包。（多謝晒！）



食食吓又再飲吓紅酒，出事了！
點解會有一陣好熟嘅怪味架！
諗咗好耐，就係講唔出！
我俾每個人都聞一聞，大家都唔覺得有咩怪味，
直至有人講話似「酸梅湯」，我再恍然大悟，係喎！
點解咁怪，係因為我唔太鐘意飲酸梅湯，
再過多陣，又有人講其實隻味應該係陳皮味，
噢！係喇，係陳皮味喇！

但問題係......點解係陳皮呢？
我做過啲咩會令到支酒嘅味變得咁特別呢？
呢個會係一個......謎..................

番外篇：
對於一個曼聯迷嚟講，嗰一晚同兩年前一樣，
又恨又服，
恨嘅係點解又係踢得唔好，
體力不足，唔緊迫，
服嘅係人地嘅默契加上靈活嘅走位，
兩三下就撕破曼聯嘅防線，再唔係就遠射，風聲鶴唳，
點都好，我相信下年曼聯必定會捲土重來！