drinkyeah 飲控 的部落格

我相信鐘意葡萄酒嘅人都鐘意睇神之水滴（台灣／內地叫神之雫），
鐘意睇神之水滴嘅喱民們點都會識啲葡萄酒嘅知識。
雖然我鐘意飲葡萄酒咁耐（其實真正鐘意飲應該得幾個月），
但係就連一頁漫畫都未睇過！
大概我對漫畫都有啲抗抵罷，又質疑佢嘅真實性。



但始終佢都係講葡萄酒嘅，我都想睇一睇，
終於上個星期開始睇，到而家睇咗七集，
真係停唔到手！

佢嘅資料搜集非常仔細，
由每個地區，到每條村，再到每個知名釀酒師，
佢都講得一清二楚。
最重要嘅係佢偏重於法國葡萄酒（至少我係咁認為）！
老實講，我係一個法國葡萄酒白痴，
我覺得法國酒太複雜喇，咁多酒莊，咁多區，
味道變代太大，根本學唔到......
但正正係咁，先係法國酒嘅魅力！

本書嘅主角神咲雫個老爸係神級葡萄酒評論家神咲 豐多香，
故事一開始就講神咲 豐多香病逝，未飲過葡萄酒嘅神咲雫正要接受有萬幾支酒嘅遺產之際，
突然殺出一個養子遠峰 一青，律師要佢地搵出豐多香指定嘅「十二門徒」同「神之水滴」，
嬴嘅先可以承繼佢嘅遺產！
漫畫中就會講神咲雫喺葡萄酒嘅成長路。



呢本漫畫會娓娓道出每個酒莊佢悠久嘅歷史，佢嘅故事，
令到你覺得睇同飲酒就好似上緊堂咁，但堂堂都係咁好聽！
至少我記得五大酒莊個名，咩年份比較好，
唔少次級酒莊嘅名！
當你去到酒鋪，你就會去搵，
跟住就會見到，原來佢講過嘅真係有！！
..........而且仲好貴添................



Chateau Calan Segur, 05年香港賣＄758，儲錢中！

我承諾，我會買番晒佢啲漫畫，全力支持！